Sot, patëm nderin të mirëpresim për vizitë në qendrën tonë znj. Albulena Haxhiu, Ministre e Drejtësisë, dhe z. Vigan Qorolli, zëvendësministër në këtë ministri. Vizita e tyre ishte një mundësi e mirë për ti prezantuar shërbimet që ofrohen në Handikos Ferizaj dhe për t’i informuar mbi sfidat e shumta me të cilat përballemi, veçanërisht në sigurimin e fondeve të qëndrueshme për këto shërbime kaq të rëndësishme dhe jetike për komunitetin të cilin e përfaqësojmë.
Gjatë vizitës, znj. Haxhiu pati mundësinë të takohej me prindërit e fëmijëve që marrin shërbime në qendrën tonë, duke dëgjuar përvojat dhe shqetësimet e tyre nga afër. Ky takim theksoi rëndësinë e mbështetjes institucionale për fëmijët dhe familjet e tyre, si dhe angazhimin tonë të pandërprerë për të përmirësuar jetën e tyre përmes shërbimeve cilësore.
Pas takimeve në qendër, së bashku vizituam objektin e ri në ndërtim, një projekt i veçantë që ka marrë jetë falë angazhimit të jashtëzakonshëm të mërgatës dhe mbështetjes së bizneseve ferizajase. Ky objekt është një hap i madh përpara në krijimin e një mjedisi modern dhe të përshtatshëm për nevojat e fëmijëve dhe të rinjëve me aftësi të kufizuara.
Kjo vizitë ishte një shembull i bashkëpunimit ndërmjet institucioneve shtetërore, komunitetit lokal duke na dhënë shpresë dhe motiv për të vazhduar punën tonë të palodhshme drejtë krijimit të një shoqërie më gjithëpërfshirëse dhe të barabartë.
